NAGA CITY- Pig-anunsyar kan Naga City Police Office (NCPO) an pagpapautob kan Ordinance No. 2016-039 sa ikukundusir na Fluvial foot procession sa maabot na Sabado, Sept. 20.
An nasambitan ng kasuguan an komo kasimbagan sa mga salang aksyon kan nagkapirang voyadores kan nakalihis na Traslacion procession.
Sigun ki NCPO spokesperson Police Lieutenant Col. Chester Pomar, an nasambitan ng ordinansa an igwang titulo na “An Ordinance Revising Ordinance No. 261, s. 1964 and Ordinance No. 92-060, Prohibiting Tumults, Drunkenness or Intoxication, or Behavior in a Drunken, Boisterous, Rude or Indecent Manner in Any Public Place or Place Open to Public View, Disorderly Gathering in Public Places, and Providing Penalties for Violations Thereof.”
Sigun ki Pomar, pigsugo ni Police Col. Gilbert Fariñas an acting city director kan NCPO an mahigot na implementasyon kan ordinance.
Kabali sa mga ordinansa an pag-aresto kan mga voyadores na nasa irarom kan impluwensiya nin arak na nag-eeskandalo o nagkakawsa nin komosyon sa kasagsagan kan procession o sa mismong presensiya kan Our Lady of Peñafrancia asin El Divino Rostro.
Katakod digde, pig-abisuhan man kan opisyal an publiko na tolos na ipaabot sa saindang opisina kun igwang mga indibidwal an nagpapasali o mayo na nin pagrespeto sa nasambitan ng aktibidad.
Puon pa kan nakalihis na semana, an Joint Operation Center an nakapagrehistro nin 10 voyadores na nagpasali kan nakalihis na Traslacion.
Katakod digde, padagos pa na pigbibisto an nasambitan ng mga indibidwal tanganing maipaapod an mga ini asin panimbagon sa saindang gawi-gawi.
Mientrastanto, pigkumpirmar man ni Pomar na an city-wide liquor ban na pighagad kan mga kapulisan gikan sa city government antes pa an Traslacion an dae naaprubahan.
Mantang an city-wide gun ban siringman an suspension kan License to Own and Possess Firearms (LTOPF) asin Permit to Carry Firearms Outside Residences (PCFOR) an nagtitinir na epektibo.
Sa ngunyan, mayo man violations kan gun ban an nairehisto kan mga kapulisan sa nagpapadagos na novena kan Our Lady of Peñafrancia
