NAGA CITY- Manlaen-laen na grupo kan mga kababaihan an nagtiripon sa parte kan Quince Martirez sa siyudad nin Naga kasabay sa selebrasyon kan International Wowen’s Day.
Sa entrevista kan Bombo Radyo Naga ki Jen Nagrampa, leader kan Bayan Bicol, sinaysay kaini na an nasambitan ng aktibidad an Nationwide na pinapangenotan kan Gabriela.
Sigun ki Nagrampa sa Bicol Region ini an Regional Coordinated Activity na pigkundusir sa Naga City, Legazpi asin Sorsogon.
Obheto kan saindang pagtiripon na ipangapudan sa gobierno na ibaba an presyuhan kan mga barakalon tanganing makatabang sa mga nanay na ma-budget nin marhay an saindang mga pangangaipuhan sa harong.
Kasabay kaya kan pagselebrar sa aldaw kan mga kababaihan, dae soboot pwedeng malingawan an mga Ina na naglalapigot tanganing makapagprovide sa saindang pamilya na orog na nasasakitan huli sa inflation sa nasyon.
Pangapudan soboot kan saindang grupo na halion na an VAT asin E-VAT huli ta nagtutubod sinda na mababa an presyo kan mga pangenot na barakalon kun hahalion na ini.
Apwera digde, hagad pa kan saindang grupo na untukan na an red tagging sa mga kababaihan huli ta mayo man ining marhay na maidudulot.
Mientrastanto, kaibahan sa aktibidad kan Bayan Bicol an mga obrerong kababaihan, paraoma, estudyante, mga jovenes, mga organisasyon asin iba pang mga mawot maipaabot an saindang mga boses ngunyan na aldaw kan mga kababaihan.
