NAGA CITY – Padagos na nadudugangan an mga kagamitan na nagagamit sa nagpapadagos na clearing operation sa siyudad nin Naga.
Sa nagin paghampang sa mga kagawad kan media ni Naga City Mayor Nelson Legacion pigsaysay kaini na an mga nadugang na equipment iyo man an 5 compactor trucks, 4 na dump trucks asin iba pang klase nin truck siringman an nasa 79 ground cleaner na nag-abot sa nasambitan ng siyudad.
Dakula soboot an nagin kontribusyon kaini asin an gabos na nagtarabang gikan sa manlaen-laen na lugar.
An Phil Eco matinir hasta Sabado, Nobyembre 9, 2024, ini igwang darang apat na darakulang dump truck asin igwang 20 personnels na nagtatabang sa paglinig puon kan nakalihis na Sabadong banggi, Nobyembre 2,2024.
Katakod digde, dakol an nagvolunteer na mga Nagueños sa pagtao nin relief asin clearing operations asin an mga ini an pigpasalamatan kan alkalde.
Pigtawan-duon pa man ni Legacion na kun pwede asin kaya pa magtabang, gibuhon na huli ta dae pa tapos an clearing operations asin kadakol pang ibang lugar sa siyudad an kadakol pang basura asin dalnak orog na sa mga barangay.
Pangapudan man kan alkalde sa mga opisyales asin empleyado kan nasambitan ng siyudad na magin parte kan pagbuhat kan Naga asin dae pagtugutan an mga sadiri na magin bystander.
Mientrastanto, pigtawan-duon pa ni Legacion na sa ibang mga tinampo nalinigan na alagad makalihis an aldaw, igwa na naman nakatambak na mga basura, ini man mga basura na gikan sa laog kan harong asin mga establisyemento.
Pigpasalamatan man kaini an nagkapirang alkalde sa luwas kan siyudad siring ninda Mayor Tom Bocago kan Sipocot, Mayor Gagay Matamorosa,asin Mayor Thaddy Ramos kan Ragay sa pagtabang sa nasambitan ng operasyon.
Padagos man na nakikiulay an opisyal sa mga may-sadiri kan mga darakulang trucks na ipasubli an mga ini hasta matapos an clearing operation.
