NAGA CITY- Aminado an Naga City Police Office na hasta soboot sa presente igwa pa man giraray na mga indibidwal na nagpwe-pwersa na magpabakal nin iligal na droga sa siyudad nin Naga.
Sa nagin paghampang sa mga kagawad kan media ni PCol.Erwin Rebellon, City Director kan NCPO sinaysay kaini na huli ta pigkokonsederar kan iba na hanap-buhay an pagpapabakal kan iligal na droga kun kaya maski mahigot an pagbabantay asin pagmonitor kan mga otoridad nakakalusot pa man giraray an iba.
An mga ini an naggigibo nin bagong modus tangani sanang makalusot asin maipagpadagos an saindang transakyon.
Alagad, pig-orgulyo man kan NCPO na dakula an naitatabang kan presensiya kan kapulisan sa Sagrada Familia nin huli ta napupugulan an transakyon kan pinapangalad na bulong sa nasambitan ng area.
Mientrastanto, pigsaysay man ni PLtCol. Dario Sola, DCDA kan NCPO na maski an suspek sa sarong krimen an bados, dae man ini nangangahulugan na excluded sa kaso.
Piglinaw kan opisyal na mayong immunity to be persecuted an mga bados sa ibong kan saindang sitwasyon alagad igwa man soboot sindang close coordination sa City health Office tanganing maasegurar na salbado ini asin an saiyang aki.
