NAGA CITY- Pigsierto kan Naga City Police Office na padagos an saindang pagtatao nin asistensiya sa pigkundusir na clearing operations sa Naga City.
Sa entrevista kan Bombo Radyo Naga ki Police Staff Sergeant Roberto Aguillon, Assistant Public Information Officer kan NCPO, sinaysay kaini na hasta kaipuhan kan bilog na siyudad an tabang kan saindang mga personahe yaon soboot an saindang hepatura tanganing mag-asister.
Sigun pa ki Aguillon, nagkundusir man an saindang opisina nin clean up drive sa may parte kan Elias Angeles St. asin padikit-dikit na nag-aabante sa paglinig. Katakod digde, sa masunod na mga aldaw, lalaugon naman kan saindang mga personahe an mga streets na hasta sa ngunyan an igwa pa man giraray nakatambak na basura.
Dugang pa kan opisyal, puon kan maghupa an baha, nagpuon naman soboot sinda sa paglilinig kun saen haros nag-abot na ini sa sarong semana.
Kasabay man kaini an paghagad nin pag-intindi ni Aguillon sa publiko na dae sabay-sabay na maririlinigan an mga areas sa bilog na siyudad nin huli ta mahewas an nagin epekto kan Bagyong Kristine.
Sa ngunyan, hagad na sana kan opisyal sa gabos na dae na pag-atian an mga lugar na nalinigan na asin pakarhayon an garbage disposal tanganing dae na makadugang sa problema na kinakahampang kan siyudad.
