Naglangkaw pa an numero kan Chinese maritime militia asin fishing vessels na nahiling sa isla nin Pag-asa sa West Philippine Sea kan nakalihis na Miyerkules.
Basado sa pagbantay kan eksperto sa seguridad sa dagat kan Estados Unidos na si Ray Powell, an bilang kan mga barko kan Tsina na nanutaran sa kadagatan naglangkaw na sa 83.
Dati nang pigbareta ni Powell na maabot sa 75 na barkong Intsik an naobserbaran sa isla, na pwedeng ikonsiderar na pinakadakulang grupo nin mga barkong Intsik na naobserbaran sa lugar na nasa laog nin 2.5 hasta 5.5 nautical miles kan isla sa laog kan 12 NM kan kadagatan teritoryal kan Pilipinas.
Sa sarong intrevista, sinabi kan Philippine Navy spokesperson for WPS Rear Admiral Roy Vincent Trinidad na haros accurate o eksakto an nagin obserbasyon ni Powell sa bilang kan mga sakayang pandagat kan Tsina sa isla huli ta harani ini sa Subi reef kun sain igwa nin artificial military base.
Mientrastanto, enot nang sinabi kan PH Navy na nagtitinir na banta an presensya kan mga barkong Chinese kabali na an saindang maritime militia, People’s Liberation Army Navy asin Coast Guard na haloy nang nagtitinir sa lugar. Sa ibong kaini, pigsierto kan opisyal kan PH Navy na padagos na ipapautob kan Philippine Armed Forces an saindang mandato na protehiran an WPS.
