Pigtawan-duon ni Committee on Public Accounts Chairman asin Bicol Saro Party-list Rep. Terry Ridon na bako si dating Presidente Rodrigo Duterte an puntirya sa isasagibong imbestigasyon kan Kamara dapit sa Manila Bay Dolomite Beach Project.
Sigun ki Ridon an dapat magpaliwanag an mga opisyal kan Department of Environment and Natural Resources (DENR) asin Department of Public Works and Highways (DPWH) kun tano pig-enot gibuhon an Dolomite Beach Project kan kasagsagan kan COVID-19 pandemic.
Pigpunto ni Ridon na mas maray kun pig-enot ginibo an mga proyekto na mapalawig sa mga sewage treatment plants asin mapamarhay sa kalidad kan tubig sa Manila Bay.
Pigtalaan an pagdangog sa November 19 kun saen enot na aaramon kan komite kun kaipuhan ba an nasambitan ng proyekto basado sa Manila Bay Sustainable Development Master Plan asin sa kasuguan kan Supreme Court katakod sa rehabilitasyon kan Manila Bay.
