Liwat na naglangkaw an presyo nin mga produktong petrolyo ngunyan na aldaw Abril 29, segun sa Department of Energy (DOE), kasunod kan naglalalang tensyon sa supply kawsa kan bagong padusang pigpataw kan Estados Unidos kontra sa oil shipping network kan Iran.
Magkakasabay na nagpa-utob nin langkaw presyo an mga kumpanya nin langis sa saindang produkto.
Malangkaw nin P1.35 sa kada litro nin gasolina. Igwa man nin P0.80 na langkaw presyo sa kada litro nin diesel mantang an kerosene man igwa nin P0.70 sa kada litro na paglangkaw.
An pagsirit kan presyo an kasunod kan lakdang kan US Treasury na patawan nin padusa si Seyed Asadoollah Emamjomeh, sarong Iranian LPG magnate, asin man an saiyang corporate network.
Sigun ki US Treasury Secretary Scott Bessent, responsable an grupo ni Emamjomeh sa pag-export kan milyun-milyong dolyar na kantidad kan Iranian LPG asin man krudo sa mga foreign markets tangani likayan an nag iiral na US sanctions.
Apwera digde, nakaapektar man sa presyo an pagbaba kan oil inventory sa US na nagpapahiwatig nin mas halangkaw na demand.
