Pigpapasierto ni Senator Erwin Tulfo sa Senado na mayong makalulusot na pork barrel o discretionary funds sa irarom kan P6.793 trillion na 2026 national budget.
Sa enot na aldaw kan budget deliberations sa plenaryo tolos na hinagad ni Tulfo, Vice Chairman kan Finance Committee, an kasiertuhan na mayo nang pork barrel o budget para sa kickback asin dae na pagkakakitaan pa kan nagkapirang lehislador an pambansang pondo siring sa flood control projects.
Pigtawan garantiya ni Senate Finance Committee Chairman Sherwin Gatchalian na an Senate version kan General Appropriations Bill (GAB) an “corruption-free” huli ta mahigot na sinda pag-abot sa detalye kan kada items na nasa budget.
Pighali naman soboot kan Senado an Strengthening Assistance for Government Infrastructure and Social Programs (SAGIP) sa irarom kan unprogrammed funds na iyong tinukoy na pinaggikanan kan bilyong pisong flood control funds kan 2023 asin 2024.
Dugang pa kan opisyal, pig-adaptar kan Senado an mas hababang kantedad nin materyales para sa imprastrakturang ipapautob kan Department of Public Works and Highways (DPWH) kun saen an bagong costing an nagresulta nin pagbaba kan kabilugang gastos kan mga proyekto kan ahensya sa masunod na taon.
