NAGA CITY- Ikinakilhag kan sarong pinakajoven na Filipino Artist an mareresiber kaining award sa 6TH International Prize for Leonardo da Vinci sa Milan Italy sa maabot na Abril, 2024.
Sa entrevista kan Bombo Radyo Naga ki Alyssa Lucelle Reynales, an youngest filipino artist na gikan sa Quezon Province, pigsaysay kaini na dae kaini piglalaoman an siring na award nin huli ta dae kaini aram kun ano an pinagbasehan tanganing ini an makabali.
Sigun ki Reynales, aki pa sana ini, kinahiligan na kaini an pagpipinta na pigsusuportaran man kan saiyang mga magurang hasta sa presente. Kun saen, binago kan arts an saiyang buhay na nagin katuwang kaini sa problema sa pinansyal, asin tinabangan man ini kan sining na makatapos sa pag-aadal.
Mientrastanto, taong 2020 man kan magpuon ining magbali sa mga internationa exhibit kun saen kan nakalihis na Disyembre, 2023 pigpinta kaini an mother inside na nagpapahiling kan labing pagpadangat kan sarong ina para sa saindang aki, siringman an kakayanan kan mga kababaehan sa ibong kan mga huma na saindang naeeksperyensiyahan.
Katakod kaini, pig-iinkaminar man kan daraga an mga jovenes na igwa man kan siring na talento na hasta joven pa asin may oras pa, dae mahandal na magpinta asin dae paghinayangan an mga materyales na masasayang siring man an kantidad kaini nin huli ta an mas nakakahinayang soboot an mga oras na papabayaan kan mga ini an mga oras asin oportunidad nin huli sa takot asin pagdududa sa sadiri.
Sa ngunyan, naglalaom na sana si Reynales na sa saiyang mareresiber na parangal, mas orog pa kaining bubuhayon an art community sa saindang probinsya.
