NAGA CITY- Padagos na pigtututukan kan pamayuhan kan FETODA an dapit sa mga pasaway na mga tricycle driver orog na an mga labi-labi an pagsisingil sa mga pasahero.
Sa entrevista kan Bombo Radyo Naga ki Gil Belen, FETODA President, sinaysay kaini na padagos an saindang ginigibong monitoring asin pagpapagirumdom sa gabos na mga miyembro kan TODA sa siyudad nin Naga na dae magbalgar sa piglatag na panundunan sa pamamasada.
Sigun sa opisyal dae masasakitan an publiko sa pagreport sa mga abusadong driver orog na ta igwang body number an saindang mga tricyle.
Katakod kaini, enkaso igwa soboot reklamo sa mga tricycle driver tolos na kuanan nin ladawan an body number kan lunadan asin ipaabot sa saindang lado o kaya PSO.
An siring na pangyayari an tolos na pig-aaksyunan kan mga operators asin kan nasambitan ng opisina tanganing dae pagpangarugan kan saindang pag-iriba.
Pigtawan duon ni Belen na mayong lugar sa saindang organisasyon an pang-aabuso orog na an overcharging.
Mientrastanto, nangapudan man ini sa publiko na dae pagtangkilikon an mga kolurom na lunadan huli ta enkaso igwang mangyari sa pasahero mayo man insurance an mga ini kun ikukumpara sa mga regular na tricyle.
Sa presente kaya nagigin ka-kompetensiya kan mga lehitimong tricycle driver kan siyudad an mga nasambitan ng kolurom orog na ta dae man pigdadakop.
Sa ngunyan, hagad na sana kaini sa pag-iriba na padagos na magsunod sa gabos na mga panundunan tanganing malikayan an pagbungkaras kan mga darakulang problema
