NAGA CITY- Pigtawan duon kan sarong abogado na bakong kaulangan an kakundian tanganing maabot kan sarong tawo an saiyang pangiturugan.
Sa entrevista kan Bombo Radyo Naga ki Atty. Paul John Barrosa, Chief of Office, Persons with Disability Affairs Officer Naga, sinaysay kaini na minsan mindset kan sarong tawo an nagigin ulang sa pag-abot sa kamawotan sa buhay.
Sigun ki Barrosa, basta desidido asin preparado na bayadan an singil kan pangarap kayang magibo. Paliwanag pa kan opisyal, an numan na pangiturugan igwang katumbas na sakripyo maski mayo o igwang kakundian an sarong indibidwal.
Kun dae preparado na hampangon ini mayong mangyayari sa buhay kan sarong tawo.
Dugang pa ki Barrosa, kaipuhan na maglapigot, magturog nin late na, magsunog nin kilay asin iba pang klase kan sakripisyo para sa pangarap.
Siringman, pigtawan duon pa ni Barrosa, an importansiya kan pagkakaigwa nin malinaw na pangiturugan. Boot sabihon, dapat aram kan sarong tawo an saiyang mawot na maabot asin igwang plano tanganing maisakatupadan ini.
Kaipuhan na magin makusog an boot kan sarong tawo anuman an saiyang pisikal na pagkukulang huli ta an kinaban sa presente nangangaipuhan nin tibay kan daghan.
Mientrastanto, pigsaysay pa kan opisyal na importante man an role kan institusyon asin kan gobierno sa pagtabang sa mga tawo huli ta nagseserbe ining paagi tanganing maabot kan siisay man an saindang mga pangiturugan.
Sa pangkabilugan, an pag-abot sa pangarap dae nakukua sa sarong bangi sana kundi sa pirang taon kan paglalapigot asin pagsasakripisyo kan sarong indibidwal.
